Fokkið ykkur

Í kringum 24. desember var Blogggáttin ekkert nema sjöþúsundogfimm „Gleðileg jól” (eða í sumum tilfellum Gleðileg Jól, en ég er löngu búinn að læra að hunsa slíkt) færslur. Nú stefnir allt í að „Gleðilegt ár” sé tískan. Fyrst einhver hafði fyrir því að skrá bloggið mitt á Gáttina að mér forspurðum vona ég að þessi titill brjóti þá tísku upp.

Enda myndi ég segja að þessi titill væri miklu fallegri og meira í takt við áramót.

Annars hef ég verið yfirgefinn af flestum vinum mínum (og meðleigjanda) um þessi áramót. Kunningjar mínir streyma til Akureyrar, þó löngu sé vitað að þar sé ekkert nema í besta falli... uhh... djúpsteiktar pylsur?

Ég læt hins vegar ekki draga mig út í slíka vitleysu. Stefni bara á frussukusksslugsupussugóð áramót í faðmi fjölskyldu, með steiktum öndum, tékkneskum Budweiser, logandi Marlboro og einhverju helvítis skaupi sem byrjar víst rétt bráðum. Gleði. Og jú, jafnvel Trivial og áfengi með nóttinni.

Góðar stundir. Áramótaannáll birtur síðar. Jafnvel um næstu áramót.

Ríkisborgararéttur

Ég er afskaplega sáttur við nýju reglurnar sem krefja útlendinga um að ná íslenskuprófi áður en þeir fá ríkisborgararétt (ég hef skrifað um slíkt áður). Það eina sem vantar til að gera reglurnar fullkomnar er að gera þær afturvirkar og svipta allt fólk sem nær ekki íslenskuprófi ríkisborgararétti. Ég get ekki beðið eftir að losna við allt fólkið af sambýlinu sem ég vinn á, til dæmis. Það á ekki séns.

Svo er ég búinn í prófum. Afrek mín í þeim náðu nýjum lægðum. Næst mun ég taka mig á og hætta að byrja frumlestur korteri fyrir próf. Ábyggilega.